Tirrioluppede

Cun ballu antigu, dae s’eternu giassu,
cando in terra s’isparghet su lentore
e de sa notte s’umbra e su lugore,
tirriolupedde movet primu passu.

Che puntu in sas pesadas de tenore,
che notas de un’amenu pentagramma
de sas animas cantat gosu e dramma
dende respiru a cussas ch’ant dolore.

In seradas de tristu iscurigore
o si appenas sa luna est ispuntada,
cun bolu misteriosu sa ballada
comintzat finas in su marigore.

E cussa pius profunda oscuridade
est pr’ issu logu ‘e danza bertudosa,
che lettu immaculadu pro s’isposa
chi dat s’amore e sa verginidade.

Issu, modellu tristu de bruttura,
si movet pius lizeru de su ‘entu,
dende prova de grascia e de talentu,
in custu mundu, amabile creatura.

- Tirriolu, ses tzegu fortunadu,
amigu de sas umbras pius arcanas,
e danzas cun sas animas galanas
a s’ora chi su sole est oscuradu.

No lu faghet su ballu tou nisciunu,
ca nisciunu connoschet de s’eternu
sa musica e su cantu, e de s’avernu
cussu logu chi toccat a donzunu.-


- Gesuino Curreli -